Акафист казанской божьей

Акафист Пресвятой Богородице пред иконой «Казанская»

Конда́к 1.

Избра́нной от все́х родо́в Засту́пнице ро́да христиа́нскаго, покро́вом Своея́ бла́гости покрыва́ющей страну́ на́шу правосла́вную, благода́рственная пе́ния прино́сим Ти́, Богоро́дице, о явле́нии чу́дныя Твоея́ ико́ны. Ты́ же, я́ко Всеми́лостивая, все́х притека́ющих к Тебе́ Помо́щнице, заступа́й на́с во все́х ско́рбех и ну́ждах, беда́х и напа́стех, да зове́м Ти́:

Ра́дуйся, Засту́пнице усе́рдная ро́да христиа́нскаго.

И́кос 1.

А́нгел предста́тель по́слан бы́сть рещи́ Богоро́дице «Ра́дуйся», егда́ Бо́г Сло́во воплоща́шеся во утро́бе Ея́: и мы́, гре́шнии, прославля́юще явле́ние чу́дныя Ея́ ико́ны и Боже́ственнаго Младе́нца Спа́са Христа́, со умиле́нием вопие́м Благода́тней:

Ра́дуйся, Богоизбра́нная Отрокови́це; ра́дуйся, Ма́ти Бо́жия.

Ра́дуйся, Цари́це Небесе́ и земли́; ра́дуйся, све́тлое Це́ркве Небе́сныя и земны́я украше́ние.

Ра́дуйся, А́нгелы чти́мая; ра́дуйся, пева́емая от Серафи́м.

Ра́дуйся, све́тлое проро́ческое сбытие́; ра́дуйся, апо́столов похвало́.

Ра́дуйся, му́ченическое испове́дание; ра́дуйся, преподо́бных ве́нче.

Ра́дуйся, пра́ведных весе́лие; ра́дуйся, гре́шных упова́ние.

Ра́дуйся, Засту́пнице усе́рдная ро́да христиа́нскаго.

Конда́к 2.

Ви́дящи, Всенепоро́чная, с высоты́ Небе́снаго жили́ща Своего́, иде́же с Сы́ном Твои́м в сла́ве пребыва́еши, ско́рбь рабо́в Твои́х в новопросвеще́ннем гра́де, я́ко гне́внаго ра́ди Бо́жия посеще́ния ве́ра Христо́ва поруга́ема быва́ет ага́рянским злове́рием, благоволи́ла еси́ яви́ти ико́ну Свою́, чудесы́ ю́ прославля́ющи, да утвержда́емии зна́меньми Твоея́ благода́ти, христолюби́вии лю́дие ве́рно вопию́т Бо́гу: Аллилу́иа.

И́кос 2.

Разуме́ние трикра́тнаго явле́ния Богома́тере му́драя отрокови́ца и́щущи, тече́ ко власте́м, пове́дающи и́м ди́вное явле́ние и гро́зное преще́ние: мы́ же дивя́щеся свы́ше да́нному отрокови́це вразумле́нию, благогове́йно вопие́м к Преблагослове́нней:

Ра́дуйся, устна́ми чи́стыми хвалу́ Бо́гови соверша́ющая; ра́дуйся, та́йны благода́ти Бо́жия ве́рным открыва́ющая.

Ра́дуйся, неве́рных сумни́тельное слы́шание; ра́дуйся, ве́рных изве́стная похвало́.

Ра́дуйся, мо́лние, неве́рных устраша́ющая; ра́дуйся, сла́вою чуде́с Твои́х ве́рных ра́зум озаря́ющая.

Ра́дуйся, ага́рянскаго злове́рия обличе́ние; ра́дуйся, горды́ни и́х низложе́ние.

Ра́дуйся, ве́ры христиа́нския утвержде́ние; ра́дуйся, почита́ния святы́х ико́н освяще́ние.

Ра́дуйся, ско́рбь на́шу в ра́дость претворя́ющая; ра́дуйся, несумне́нною наде́ждою на́с увеселя́ющая.

Ра́дуйся, Засту́пнице усе́рдная ро́да христиа́нскаго.

Конда́к 3.

Си́ла Вы́шняго благода́тию Богома́тере умудри́ и укрепи́ отрокови́цу к иска́нию многоце́ннаго Бо́жия да́ра, и та́, с ве́рою дерза́ющи о Го́споде, приступи́ к труду́ и, скры́тое в земли́ обре́тши сокро́вище святы́я ико́ны Богома́тери, ра́достно возопи́ к Бо́гу: Аллилу́иа.

И́кос 3.

Име́ющи благоутро́бное промышле́ние о новопросвеще́нных лю́дех гра́да Каза́ни, от пречестны́я Твоея́ ико́ны то́ки чуде́с источи́ла еси́, Влады́чице, слепы́м теле́сныма очи́ма зре́ние подава́ющи, омраче́нных же душе́вно све́том богопозна́ния и благоче́стия озаря́ющи, де́вствующим под осене́нием Твоея́ ико́ны приста́нище небу́рное да́рующи. Сего́ ра́ди зове́м Ти́:

Ра́дуйся, явле́нием ико́ны Твоея́ тьму́ лю́тых обстоя́ний отгоня́ющая; ра́дуйся, луча́ми чуде́с все́х просвеща́ющая.

Ра́дуйся, слепы́х прозре́ние; ра́дуйся, омраче́нных смы́слом просвеще́ние.

Ра́дуйся, сла́во Правосла́вия; ра́дуйся, ти́хое приста́нище и́щущих спасе́ния.

Ра́дуйся, Ма́ти целому́дрия; ра́дуйся, покро́ве и огражде́ние де́вства.

Ра́дуйся, Е́юже ликовству́ет все́ мно́жество ве́рных; ра́дуйся, Ея́же ра́ди рыда́ет де́монское по́лчище.

Ра́дуйся, все́х христиа́н вожделе́нная Помо́щнице; ра́дуйся, все́х скорбя́щих Ра́досте.

Ра́дуйся, Засту́пнице усе́рдная ро́да христиа́нскаго.

Конда́к 4.

Бу́рю смяте́ний и крамо́лы врага́ми воздви́гнутую в стране́ на́шей утоли́ти тща́щься блаже́нный Ермоге́н, списа́тель чуде́с Твоея́, Богома́ти, ико́ны, сле́зно пред не́ю моля́шеся и, ви́дев, я́ко во́инству правосла́вному в щи́т и побе́дное зна́мение Твоя́ ико́на дарова́ся, ве́рою укрепля́емый до конца́ живота́ своего́, вопия́ше Бо́гу: Аллилу́иа.

И́кос 4.

Слы́шавше правосла́внии во́ини открове́нную Преподо́бным Се́ргием святи́телю Арсе́нию та́йну, я́ко предста́тельством Богома́тере су́д об Оте́честве на́шем преложе́н на ми́лость, ико́ну Богома́терню, я́ко зна́мя побе́дное, прии́мше, исхити́ша ма́терь градо́в ру́сских из ру́к супоста́т и возопи́ша Засту́пнице христиа́н:

Ра́дуйся, Ма́ти Бо́га Вы́шняго; ра́дуйся, я́ко за все́х мо́лиши Сы́на Твоего́, Христа́ Бо́га на́шего.

Ра́дуйся, я́ко все́м твори́ши спасти́ся в держа́вный Тво́й покро́в прибега́ющим; ра́дуйся, Засту́пнице все́х су́щих в ско́рбех и боле́знех.

Ра́дуйся, все́м моля́щимся сокруше́нным се́рдцем пред пречи́стым Твои́м о́бразом поле́зная да́рующая; ра́дуйся, избавле́ние зо́л все́м, невозвра́тно наде́жду иму́щим на Тя́.

Ра́дуйся, ти́хое и до́брое приста́нище; ра́дуйся, ско́рая Помо́щнице.

Ра́дуйся, гото́вый и те́плый покро́ве спасе́ния; ра́дуйся, источа́ющая на́м неоску́дныя ми́лости.

Ра́дуйся, предваря́ющая на по́мощь; ра́дуйся, избавля́ющая от все́х бе́д.

Ра́дуйся, Засту́пнице усе́рдная ро́да христиа́нскаго.

Конда́к 5.

Боготе́чная звезда́ яви́ся Твоя́, Богома́ти, ико́на, всю́ страну́ Росси́йскую обтека́ющая, луча́ми чуде́с Твои́х осиява́ющая все́х блужда́ющих по мо́рю стра́стнаго жития́, мра́к печа́лей и мглу́ вся́ких неду́г и скорбе́й прогоня́ющая и наставля́ющая на пу́ть спасе́ния с ве́рою к Тебе́ притека́ющих и вопию́щих к Бо́гу: Аллилу́иа.

И́кос 5.

Ви́дев ца́рь Пе́тр, я́ко от святы́я ико́ны Богома́терни благода́тию Бо́жиею содева́ются мно́гия чудеса́, прие́млет ю́ в путеводи́тельницу во́инству своему́ и в де́нь бра́ни на све́ев в щи́т и покро́в, и победи́в до конца́ врага́ с по́мощию Богома́тере, те́м ка́мень соверше́нный во основа́ние но́ваго ца́рствующего гра́да положи́, ико́ну же Твою́ чу́дную, я́ко освяще́ние, я́ко щи́т и огражде́ние, в се́рдце гра́да поста́ви. Сего́ ра́ди вопие́м Пречи́стей:

Ра́дуйся, жили́ще и до́ме Христа́ Бо́га на́шего; ра́дуйся, вмести́лище неизрече́нныя Его́ сла́вы.

Ра́дуйся, гра́де одушевле́нный, при́сно ца́рствующий; ра́дуйся, пала́то преукраше́нная.

Ра́дуйся, Ра́досте градо́в и ве́сей; ра́дуйся, непобеди́мое христиа́н в беда́х храни́лище и предгра́дие.

Ра́дуйся, Це́ркве Правосла́вныя похвало́; ра́дуйся, Ру́сской земли́ утвержде́ние.

Ра́дуйся, христолюби́ваго во́инства Помо́щнице; ра́дуйся, враго́в одоле́ние.

Ра́дуйся, от бе́д избавле́ние; ра́дуйся, Ма́терними Твои́ми щедро́тами все́х посеща́ющая.

Ра́дуйся, Засту́пнице усе́рдная ро́да христиа́нскаго.

Конда́к 6.

Предстоя́ще пред пречи́стым Твои́м о́бразом архиере́ев сосло́вии и вси́ лю́дие, мона́си и мирсти́и, пропове́дуют, Госпоже́ Богороди́тельнице, вели́кия Твоя́ ми́лости, я́ко гра́ды огражда́еши, оби́тели покрыва́еши, ве́си защища́еши, и, ве́дуще Тя́ вои́стинну Помо́щницу си́льну и непобеди́му, со слеза́ми прино́сят Ти́ моли́твы, да простре́ши к Сы́ну Твоему́ Богоно́сныя ру́ки за лю́ди Твоя́, во е́же изба́вити на́с от все́х бе́д и напа́стей, да благода́рне вопие́м Бо́гу: Аллилу́иа.

И́кос 6.

Возсия́вши просвеще́ние и́стинное и отгна́вши дре́вле ле́сть ага́рянскую во новопросвеще́нней стране́ Каза́нской, ны́не во все́х гра́дех росси́йских све́тиши све́том чуде́с и ми́лостей: притека́ющий бо с ве́рою ко Твое́й ико́не цельбоно́сней скорбе́й избавле́ние, неду́гов исцеле́ние и ра́дости вся́кия исполне́ния прие́млют, вопию́ще Тебе́ усе́рдно:

Ра́дуйся, неистощи́мый исто́чниче святы́ни; ра́дуйся, многотеку́щая реко́ Боже́ственныя благода́ти.

Ра́дуйся, гре́шных с Бо́гом примире́ние; ра́дуйся, грехо́в на́ших очище́ние.

Ра́дуйся, благоче́стия Наста́внице; ра́дуйся, в до́брых де́лех утвержде́ние и по́моще.

Ра́дуйся, до́брыя обе́ты прие́млющая; ра́дуйся, благи́м наме́рением спосо́бствующая.

Ра́дуйся, злы́я начина́ния разруша́ющая; ра́дуйся, вра́жия ко́зни расторга́ющая.

Ра́дуйся, ско́рая челове́ком Помо́щнице; ра́дуйся, ми́лость сугу́бо на́м подаю́щая.

Ра́дуйся, Засту́пнице усе́рдная ро́да христиа́нскаго.

Конда́к 7.

Хотя́щу наро́ду правосла́вному испове́дати ми́лости Преблагослове́нныя Цари́цы Не́ба и земли́ и по си́ле благода́рственная принести́ о избавле́нии его́ от наше́ствия иноплеме́нных, ди́вному хра́му, созда́нному в че́сть пречу́дныя ико́ны, побе́дная в да́р принесе́, да вси́ па́мятующе ми́лость Богома́тере, спа́сшия гра́д се́й и страну́, вы́ну воспева́ют Бо́гу благода́рными усты́: Аллилу́иа.

И́кос 7.

Сто́льному гра́ду Росси́и свята́я ико́на Твоя́, Богома́ти, вои́стинну яви́ся блага́я Одиги́трия, я́коже дре́вле Царегра́ду: к Тебе́ бо прибега́ют лю́дие, по́мощи Твоея́ на нача́ло пути́ и де́л свои́х прося́ще и благода́рственная принося́ще моле́ния пред пречи́стою ико́ною Твое́ю за избавле́ние от скорбе́й и напа́стей, Тебе́ Помо́щницу и Засту́пницу кре́пкую ве́дают. Те́мже благода́рственно вопие́м Ти́:

Ра́дуйся, Росси́йския страны́ покро́ве; ра́дуйся, Правосла́вия в не́й огражде́ние и утвержде́ние.

Ра́дуйся, несокруши́мый щи́те во́инов на́ших; ра́дуйся, броне́ и́х неуязви́мая.

Ра́дуйся, ко́зни враго́в облича́ющая; ра́дуйся, я́ко паучи́ну и́х растерза́ющая.

Ра́дуйся, нече́стия обличе́ние; ра́дуйся, крамо́лы разруше́ние.

Ра́дуйся, ю́ных от заблужде́ний исправле́ние; ра́дуйся, ста́рцев утеше́ние.

Ра́дуйся, душевре́дных уче́ний низложе́ние; ра́дуйся, душеполе́зных зна́ний дарова́ние.

Ра́дуйся, Засту́пнице усе́рдная ро́да христиа́нскаго.

Конда́к 8.

Стра́нно и сумни́тельно неве́рующим слу́шати, ка́ко от ико́ны Твоея́ то́ки благода́ти истека́ют, воня́ живо́тная благоуха́ет: мы́ же, ве́рующе сло́ву, рече́нному Тобо́й, Влады́чице, к первонапи́санней ико́не: «С тобо́й Моя́ благода́ть и си́ла», упова́ем, я́ко и с се́ю ико́ною благода́ть Твоя́ вы́ну: те́мже благогове́йно предстоя́ще лобыза́ем ю́, поклоня́емся е́й, я́ко Тебе́ Саме́й су́щей, че́сть бо ико́ны на первообра́зное восхо́дит, и Твоя́ благода́ть се́ю ико́ною зна́мения и чудеса́ содева́ет все́м с ве́рою притека́ющим к Тебе́ и вопию́щим Бо́гу: Аллилу́иа.

И́кос 8.

Вся́ бы́вши горе́, к Небе́сным взя́та, и земны́х не оставля́еши, Богома́ти, свяще́нным Твои́м предста́тельством: и́маши бо ма́тернее дерзнове́ние ко Христу́ Бо́гу на́шему. Те́мже утверди́ в ми́ре глубо́це правосла́вных житие́ и вся́ поле́зная всегда́ да́руй рабо́м Твои́м, да велича́юще воспева́ем Ти́:

Ра́дуйся, Невмести́маго вмести́лище; ра́дуйся, осене́нная си́лою Вы́шняго.

Ра́дуйся, прозя́бшая Кла́с Небе́сный; ра́дуйся, ми́р ве́сь душепа́губнаго гла́да изба́вльшая.

Ра́дуйся, вы́ну хода́тайствующая за ро́д на́ш; ра́дуйся, я́ко мно́го мо́жет моли́тва Твоя́ пред Сы́ном Твои́м и Бо́гом.

Ра́дуйся, все́х на́с при Кресте́ Сы́на Твоего́ усынови́вшая; ра́дуйся, всегда́ Ма́тернюю любо́вь к на́м явля́ющая.

Ра́дуйся, Хода́таице ве́чных бла́г; ра́дуйся, и во вре́менней жи́зни поле́зная на́м подаю́щая.

Ра́дуйся, изве́стное прибе́жище на́ше во все́х ско́рбных обстоя́ниих; ра́дуйся, несомне́нное утеше́ние в печа́лех.

Ра́дуйся, Засту́пнице усе́рдная ро́да христиа́нскаго.

Конда́к 9.

Вся́каго естества́ а́нгельскаго превы́шшая яви́лася еси́, Пресвята́я Де́во: Бо́га бо зачала́ еси́ пло́тию, Невмести́маго все́ми вмести́ла еси́ во утро́бе Твое́й, на рука́х носи́ла еси́ Нося́щаго ве́сь ми́р дла́нию: те́мже, я́ко Честне́йшую Херуви́м и Сла́внейшую без сравне́ния Серафи́м велича́юще Тя́, вопие́м о Тебе́ Бо́гу: Аллилу́иа.

И́кос 9.

Вити́я многовеща́нныя, я́ко ры́бы безгла́сныя, ви́дим о Тебе́, Богоро́дице: недоуме́ет бо вся́к язы́к благохвали́ти Тя́ по достоя́нию, изумева́ет у́м пе́ти Тя́, Богоро́дице; оба́че Блага́я су́щи, приими́ и от на́с арха́нгельский гла́с, Тебе́ вопию́щих:

Ра́дуйся, Благода́тная; ра́дуйся, я́ко Госпо́дь с Тобо́ю.

Ра́дуйся, Благослове́нная в жена́х; ра́дуйся, обре́тшая благода́ть у Бо́га.

Ра́дуйся, роди́вшая Спаси́теля ми́ру; ра́дуйся, Ма́ти Сы́на Бо́жия.

Ра́дуйся, Роди́тельнице Ве́чнаго Царя́; ра́дуйся, израсти́вшая на́м пло́д живота́.

Ра́дуйся, освяще́нная Ду́хом Святы́м; ра́дуйся, осене́нная си́лою Всевы́шняго.

Ра́дуйся, ве́рная Рабо́ Госпо́дня; ра́дуйся, я́ко Тя́ блажа́т вси́ ро́ди.

Ра́дуйся, Засту́пнице усе́рдная ро́да христиа́нскаго.

Конда́к 10.

Спасти́ хотя́щи мно́гия от находя́щих зо́л, скорбе́й и боле́зней, чу́дную ико́ну Твою́, Богома́ти, дарова́ла еси́, ея́же ра́ди слепи́и прозира́ют, хроми́и хо́дят, разсла́бленнии возстаю́т, бесну́ющиися исцеля́ются, земли́ плодоно́сие подае́тся, лю́дие от смертоно́сныя я́звы избавля́ются, гра́ды и до́мы от огня́ спаса́ются: те́мже прославля́юще Бо́га, даю́щаго на́м таковы́я ми́лости, вопие́м Ему́ усе́рдно: Аллилу́иа.

И́кос 10.

Стена́ еси́, Богоро́дице, стране́ Росси́йстей, гра́дом огражде́ние и сла́ва, правосла́вному во́инству на враги́ укрепле́ние. Те́мже, благодаря́ще Тя́, вопие́м:

Ра́дуйся, прославля́ющих Тя́ прославля́ющая; ра́дуйся, не чту́щих Тя́ посрамля́ющая.

Ра́дуйся, враго́в устраше́ние; ра́дуйся, от наше́ствия иноплеме́нных избавле́ние.

Ра́дуйся, во́инов кре́посте; ра́дуйся, в дни́ бра́ни забра́ло и огражде́ние.

Ра́дуйся, в дни́ ми́ра живоно́сный са́де, увеселя́ющий сердца́ ве́рных; ра́дуйся, ору́жие, его́же трепе́щут де́мони.

Ра́дуйся, спаси́тельный еле́й, умаща́ющий грехо́вныя ра́ны ка́ющихся; ра́дуйся, те́плое на́ше упова́ние.

Ра́дуйся, несумне́нная на́ша Наде́ждо; ра́дуйся, ти́хое и до́брое приста́нище.

Ра́дуйся, Засту́пнице усе́рдная ро́да христиа́нскаго.

Конда́к 11.

Пе́ние хвале́бное и благода́рственное прино́сят Тебе́, Влады́чице, припа́дающе ко ико́не Твое́й и любе́зно лобыза́юще ю́, де́в ли́цы, под держа́вным покро́вом Твои́м ти́хое и ми́рное и́ноческое житие́ провожда́ющии, и возложи́вше на Тя́ все́ упова́ние, ра́достно вопию́т Бо́гу: Аллилу́иа.

И́кос 11.

Я́ко светоприе́мную свещу́, зри́м Твою́ честну́ю ико́ну, Пресвята́я Влады́чице: та́ бо невеще́ственный о́гнь благода́ти Твоея́ восприе́мши, и в подо́биих ея́ но́вы возжига́ет свети́льники, прича́стны тоя́жде си́лы благода́тныя, и озаря́ет чудесы́, наставля́ющи на пу́ть спасе́ния все́х вопию́щих Ти́ си́це:

Ра́дуйся, Неве́сто Неневе́стная; ра́дуйся, Богоизбра́нная Отрокови́це, Ма́ти Де́во.

Ра́дуйся, до́брая Наста́внице непоро́чнаго де́вства; ра́дуйся, Храни́тельнице ревну́ющих о чистоте́.

Ра́дуйся, же́н похвало́; ра́дуйся, де́в велича́ние.

Ра́дуйся, вдо́в заступле́ние; ра́дуйся, сиро́т призре́ние.

Ра́дуйся, ни́щих Пита́тельнице; ра́дуйся, наги́х одея́ние.

Ра́дуйся, печа́льных утеше́ние; ра́дуйся, скорбя́щих весе́лие.

Ра́дуйся, Засту́пнице усе́рдная ро́да христиа́нскаго.

Конда́к 12.

Благода́ть да́ти восхоте́вши почита́ющим Тя́ с любо́вию, Богороди́тельнице, прису́щего Ти́ си́лу благода́тную оста́вила еси́ во святы́х Твои́х ико́нах, и́бо Боже́ственная благода́ть, спребыва́ющи те́м (ико́нам), зна́мения и чудеса́ вы́ну содева́ет и душе́вных и теле́сных неду́г исцеле́ние все́м с ве́рою приходя́щим подае́т Твои́ми Богома́терними непреста́нными к Бо́гу моли́твами о вопию́щих Ему́: Аллилу́иа.

И́кос 12.

Пою́ще Твоя́ чудеса́, бы́вшая в дре́вняя и настоя́щая времена́, хва́лим Тя́, я́ко Живоно́сный Исто́чник благода́ти, я́ко неистощи́мую реку́ чуде́с, я́ко бе́здну ми́лости и щедро́т, и все́ упова́ние по Бо́зе возлага́юще на Тя́ и в се́й и в бу́дущей жи́зни, прославля́юще Тя́, вопие́м:

Ра́дуйся, христиа́н непосты́дное упова́ние; ра́дуйся, ве́рных спаси́тельное прибе́жище.

Ра́дуйся, ненаде́жных наде́яние; ра́дуйся, отча́янных спасе́ние.

Ра́дуйся, ба́не, омыва́ющая со́весть; ра́дуйся, росо́, оживля́ющая ду́ши.

Ра́дуйся, боле́зней врачевство́ ско́рое и безме́здное; ра́дуйся, от все́х бе́д бы́строе избавле́ние.

Ра́дуйся, Уте́шительнице во вся́кой ско́рби; ра́дуйся, из глубины́ поги́бели спаса́ющая.

Ра́дуйся, отра́до в де́нь сме́рти; ра́дуйся, еди́ная Наде́ждо и по сме́рти.

Ра́дуйся, Засту́пнице усе́рдная ро́да христиа́нскаго.

Конда́к 13.

О Всепе́тая Ма́ти, ро́ждшая все́х святы́х Святе́йшее Сло́во, приими́ ны́не ма́лое сие́ моле́ние и, вели́чия ра́ди бла́гости Твоея́ и бе́здны щедро́т Твои́х, не помяни́ мно́жества грехо́в на́ших, но испо́лни во благи́х проше́ния на́ша, подава́ющи те́лу здра́вие, ду́ши спасе́ние, избавля́ющи от вся́кия ну́жды и печа́ли и Ца́рствия Небе́снаго насле́дники сотворя́ющи все́х ве́рно вопию́щих Бо́гу: Аллилу́иа.

Этот конда́к читается трижды, затем икос 1-й и конда́к 1-й.

И́кос 1.

А́нгел предста́тель по́слан бы́сть рещи́ Богоро́дице «Ра́дуйся», егда́ Бо́г Сло́во воплоща́шеся во утро́бе Ея́: и мы́, гре́шнии, прославля́юще явле́ние чу́дныя Ея́ ико́ны и Боже́ственнаго Младе́нца Спа́са Христа́, со умиле́нием вопие́м Благода́тней:

Ра́дуйся, Богоизбра́нная Отрокови́це; ра́дуйся, Ма́ти Бо́жия.

Ра́дуйся, Цари́це Небесе́ и земли́; ра́дуйся, све́тлое Це́ркве Небе́сныя и земны́я украше́ние.

Ра́дуйся, А́нгелы чти́мая; ра́дуйся, пева́емая от Серафи́м.

Ра́дуйся, све́тлое проро́ческое сбытие́; ра́дуйся, апо́столов похвало́.

Ра́дуйся, му́ченическое испове́дание; ра́дуйся, преподо́бных ве́нче.

Ра́дуйся, пра́ведных весе́лие; ра́дуйся, гре́шных упова́ние.

Ра́дуйся, Засту́пнице усе́рдная ро́да христиа́нскаго.

Конда́к 1.

Избра́нной от все́х родо́в Засту́пнице ро́да христиа́нскаго, покро́вом Своея́ бла́гости покрыва́ющей страну́ на́шу правосла́вную, благода́рственная пе́ния прино́сим Ти́, Богоро́дице, о явле́нии чу́дныя Твоея́ ико́ны. Ты́ же, я́ко Всеми́лостивая, все́х притека́ющих к Тебе́ Помо́щнице, заступа́й на́с во все́х ско́рбех и ну́ждах, беда́х и напа́стех, да зове́м Ти́:

Ра́дуйся, Засту́пнице усе́рдная ро́да христиа́нскаго.

Моли́тва пе́рвая.

О Пресвята́я Госпоже́ Влады́чице Богоро́дице! Со стра́хом, ве́рою и любо́вию припа́дающе пред честно́ю ико́ною Твое́ю, мо́лим Тя́: не отврати́ лица́ Твоего́ от прибега́ющих к Тебе́, умоли́ милосе́рдая Ма́ти, Сы́на Твоего́ и Бо́га на́шего, Го́спода Иису́са Христа́, да сохрани́т ми́рну страну́ на́шу, Це́рковь Свою́ Святу́ю да незы́блему соблюде́т от неве́рия, ересе́й и раско́ла. Не и́мамы бо ины́я по́мощи, не и́мамы ины́я наде́жды, ра́зве Тебе́, Пречи́стая Де́во: Ты́ еси́ Всеси́льная христиа́н Помо́щница и Засту́пница. Изба́ви все́х с ве́рою Тебе́ моля́щихся от паде́ний грехо́вных, от наве́та злы́х челове́к, от вся́ких искуше́ний, скорбе́й, бе́д и от напра́сныя сме́рти: да́руй на́м ду́х сокруше́ния, смире́ние се́рдца, чистоту́ помышле́ний, исправле́ние грехо́вныя жи́зни и оставле́ние прегреше́ний, да вси́ благода́рне воспева́юще вели́чия Твоя́, сподо́бимся Небе́снаго Ца́рствия и та́мо со все́ми святы́ми просла́вим Пречестно́е и Великоле́пое И́мя Отца́ и Сы́на и Свята́го Ду́ха. Ами́нь.

Моли́тва втора́я.

О, Пресвята́я Влады́чице Богоро́дице, Цари́це Небеси́ и земли́, вы́шшая а́нгел и арха́нгел и всея́ тва́ри честне́йшая, чи́стая Де́во Мари́е, ми́ру блага́я Помо́щнице, и все́м лю́дем утвержде́ние, и во вся́ких ну́ждах избавле́ние! При́зри и ны́не, Госпоже́ Всеми́лостивая, на рабы́ Твоя́, Тебе́ умиле́нною душе́ю и сокруше́нным се́рдцем моля́щияся, со слеза́ми к Тебе́ припа́дающия и покланя́ющияся пречи́стому и цельбоно́сному о́бразу Твоему́, и по́мощи и заступле́ния Твоего́ прося́щия. О, Всеми́лостивая и Премилосе́рдая Де́во Богоро́дице Чи́стая! Воззри́, Госпоже́, на лю́ди Твоя́: мы́ бо гре́шнии не и́мамы ины́я по́мощи, ра́зве Тебе́ и от Тебе́ ро́ждшагося Христа́ Бо́га на́шего. Ты́ еси́ засту́пница и предста́тельница на́ша. Ты́ еси́ оби́димых защище́ние, скорбя́щим ра́дование, си́рым прибе́жище, вдо́вам храни́тельница, де́вам сла́ва, пла́чущим весе́лие, больны́м посеще́ние, немощны́м исцеле́ние, гре́шным спасе́ние, Сего́ ра́ди, о Богома́ти, к Тебе́ прибега́ем, и на Тво́й Пречи́стый о́браз с Предве́чным на руку́ Твое́ю держи́мым Младе́нцем, Го́сподем на́шим Иису́сом Христо́м взира́юще, умиле́нное пе́ние Тебе́ прино́сим и вопие́м: поми́луй на́с, Ма́ти Бо́жия, и проше́ние на́ше испо́лни, вся́ бо су́ть возмо́жна хода́тайству Твоему́: я́ко Тебе́ сла́ва подоба́ет ны́не и при́сно и во ве́ки веко́в. Ами́нь.

Икона Божией Матери «Казанская»

АКАФИСТ ПРЕСВЯТЕЙ БОГОРОДИЦЕ В ЧЕСТЬ ИКОНЫ ЕЯ «КАЗАНСКАЯ»

Кондак 1

Избранней от всех родов Заступнице рода христианскаго, покровом Своея благости покрывающей страну нашу православную, благодарственная пения приносим Ти, Богородице, о явлении чудныя Твоея иконы. Ты же, яко Всемилостивая, всех притекающих к Тебе Помощнице, заступай нас во всех скорбех и нуждах, бедах и напастех, да зовем Ти:

Радуйся, Заступнице усердная рода христианскаго.

Икос1

Ангел предстатель послан бысть рещи Богородице: «Радуйся», егда Бог Слово воплощашеся во утробе Ея; и мы, грешнии, прославляюще явление чудныя Ея иконы и Божественнаго Младенца Спаса Христа, со умилением вопием Благодатней:

Радуйся, Богоизбранная Отроковице; радуйся, Мати Божия.

Радуйся, Царице Небесе и земли; радуйся, светлое Церкве Небесныя и земныя украшение.

Радуйся, Ангелы чтимая; радуйся, певаемая от Серафим.

Радуйся, светлое пророческое сбытие; радуйся, апостолов похвало.

Радуйся, мученическое исповедание; радуйся, преподобных венче.

Радуйся, праведных веселие; радуйся, грешных упование.

Радуйся, Заступнице усердная рода христианскаго.

Кондак 2

Видящи, Всенепорочная, с высоты Небеснаго жилища Своего, идеже с Сыном Твоим в славе пребываеши, скорбь рабов Твоих в новопросвещеннем граде, яко гневнаго ради Божия посещения вера Христова поругаема бывает агарянским зловерием, благоволила еси явити икону Свою, чудесы ю прославляющи, да, утверждаеми знаменьми Твоея благодати, христолюбивии людие верно вопиют Богу: Аллилуиа.

Икос 2

Разумение трикратнаго явления Богоматере мудрая отроковица ищущи, тече ко властем, поведающи им дивное явление и грозное прещение; мы же дивящеся свыше данному отроковице вразумлению, благоговейно вопием к Преблагословенней:

Радуйся, устнами чистыми хвалу Богови совершающая; радуйся, тайны благодати Божия верным открывающая.

Радуйся, верных известная похвало; радуйся, молние, неверных устрашающая.

Радуйся, славою чудес Твоих верных разум озаряющая; радуйся, агарянскаго зловерия обличение.

Радуйся, гордыни их низложение; радуйся, веры христианския утверждение.

Радуйся, почитания святых икон освящение; радуйся, скорбь нашу в радость претворяющая.

Радуйся, несумненною надеждою нас увеселяющая.

Радуйся, Заступнице усердная рода христианскаго.

Кондак 3

Сила Вышняго благодатию Богоматере умудри и укрепи отроковицу к исканию многоценнаго Божия дара, и та, с верою дерзающи о Господе, приступи к труду и, скрытое в земли обретши сокровище святыя иконы Богоматерни, радостно возопи к Богу: Аллилуиа.

Икос 3

Имеющи благоутробное промышление о новопросвещенных людех града Казани, от пречестныя Твоея иконы токи чудес источила еси, Владычице, слепым телесныма очима зрение подавающи, омраченных же душевно светом богопознания и благочестия озаряющи, девствующим под осенением Твоея иконы пристанище небурное дарующи. Сего ради зовем Ти:

Радуйся, явлением иконы Твоея тьму лютых обстояний отгоняющая; радуйся, лучами чудес всех просвещающая.

Радуйся, слепых прозрение; радуйся, омраченных смыслом просвещение.

Радуйся, славо Православия; радуйся, тихое пристанище ищущих спасения.

Радуйся, Мати целомудрия; радуйся, покрове и ограждение девства.

Радуйся, Еюже ликовствует все множество верных; радуйся, Еяже ради рыдает демонское полчище.

Радуйся, всех христиан вожделенная Помощнице; радуйся, всех скорбящих Радосте.

Радуйся, Заступнице усердная рода христианскаго.

Кондак 4

Бурю смятений и крамолы врагами воздвигнутую в стране нашей утолити тщася блаженный Ермоген, списатель чудес Твоея, Богомати, иконы, слезно пред нею моляшеся и, видев, яко воинству православному в щит и победное знамение Твоя икона даровася, верою укрепляемый до конца живота своего, вопияше Богу: Аллилуиа.

Икос 4

Слышавше православнии воини откровенную преподобным Сергием святителю Арсению тайну, яко предстательством Богоматере суд об Отечестве нашем преложен на милость, икону Богоматерню, яко знамя победное, приимше, исхитиша матерь градов русских из рук супостат и возопиша Заступнице христиан:

Радуйся, Мати Бога Вышняго; радуйся, яко за всех молиши Сына Твоего, Христа Бога нашего.

Радуйся, яко всем твориши спастися в державный Твой покров прибегающим; радуйся, Заступнице всех сущих в скорбех и болезнех.

Радуйся, всем молящимся сокрушенным сердцем пред пречистым Твоим образом полезная дарующая; радуйся, избавление зол всем, невозвратно надежду имущим на Тя.

Радуйся, тихое и доброе пристанище; радуйся, скорая Помощнице.

Радуйся, готовый и теплый покрове спасения; радуйся, источающая нам неоскудныя милости.

Радуйся, предваряющая на помощь; радуйся, избавляющая от всех бед.

Радуйся, Заступнице усердная рода христианскаго.

Кондак 5

Боготечная звезда явися Твоя, Богомати, икона, всю страну Российскую обтекающая, лучами чудес Твоих осиявающая всех блуждающих по морю страстнаго жития, мрак печалей и мглу всяких недуг и скорбей прогоняющая и наставляющая на путь спасения с верою к Тебе притекающих и вопиющих к Богу: Аллилуиа.

Икос 5

Видев царь Петр, яко от святыя иконы Богоматерни благодатию Божиею содеваются многая чудеса, приемлет ю в путеводительницу воинству своему и в день брани на свеев в щит и покров и, победив до конца врага помощию Богоматере, тем камень совершенный во основание новаго царствующего града положи, икону же Твою чудную, яко освящение, яко щит и ограждение, в сердце града постави. Сего ради вопием Пречистей:

Радуйся, жилище и доме Христа Бога нашего; радуйся, вместилище неизреченныя Его славы.

Радуйся, граде одушевленный, присно царствующий; радуйся, палато преукрашенная.

Радуйся, Радосте градов и весей; радуйся, непобедимое христиан в бедах хранилище и предградие.

Радуйся, Церкве Православныя похвало; радуйся, Русской земли утверждение.

Радуйся, христолюбиваго воинства Помощнице; радуйся, врагов одоление.

Радуйся, от бед избавление; радуйся, Матерними Твоими щедротами всех посещающая.

Радуйся, Заступнице усердная рода христианскаго.

Кондак 6

Предстояще пред пречистым Твоим образом архиереев сословие и вси людие, монаси и мирстии, проповедуют, Госпоже Богородительнице, великия Твоя милости, яко грады ограждаеши, обители покрываеши, веси защищаеши, и, ведуще Тя воистину Помощницу сильну и непобедиму, со слезами приносят Ти молитвы, да простреши к Сыну Твоему Богоноснеи руце за люди Твоя, во еже избавити нас от всех бед и напастей, да благодарне вопием Богу: Аллилуиа.

Икос 6

Возсиявши просвещение истинное и отгнавши древле лесть агарянскую в новопросвещенней стране Казанской, ныне во всех градех российских светиши светом чудес и милостей: притекающии бо с верою ко Твоей иконе цельбоносней скорбей избавление, недугов исцеление и радости всякия исполнения приемлют, вопиюще Тебе усердно:

Радуйся, неистощимый источниче святыни; радуйся, многотекущая реко Божественныя благодати.

Радуйся, грешных с Богом примирение; радуйся, грехов наших очищение.

Радуйся, благочестия Наставнице; радуйся, в добрых делех утверждение и помоще.

Радуйся, добрыя обеты приемлющая; радуйся, благим намерением способствующая.

Радуйся, злая начинания разрушающая; радуйся, вражия козни расторгающая.

Радуйся, скорая человеком Помощнице; радуйся, милость сугубо нам подающая.

Радуйся, Заступнице усердная рода христианскаго.

Кондак 7

Хотящу народу православному исповедати милости Преблагословенныя Царицы Неба и земли и по силе благодарственная принести о избавлении его от нашествия иноплеменных, дивному храму, созданному в честь пречудныя иконы, победная в дар принесе, да вси памятующе милость Богоматере, спасшия град сей и страну, выну воспевают Богу благодарными усты: Аллилуиа.

Икос 7

Стольному граду России святая икона Твоя, Богомати, воистину явися благая Одигитрия, якоже древле Цареграду: к Тебе бо прибегают людие, помощи Твоея на начало пути и дел своих просяще и благодарственная приносяще моления пред пречистою иконою Твоею за избавление от скорбей и напастей, Тебе Помощницу и Заступницу крепкую ведают. Темже благодарственно вопием Ти:

Радуйся, Российския страны покрове; радуйся, Православия в ней ограждение и утверждение.

Радуйся, несокрушимый щите воинов наших; радуйся, броне их неуязвимая.

Радуйся, козни врагов обличающая; радуйся, яко паучину их растерзающая.

Радуйся, нечестия обличение; радуйся, крамолы разрушение.

Радуйся, юных от заблуждений исправление; радуйся, старцев утешение.

Радуйся, душевредных учений низложение; радуйся, душеполезных знаний дарование.

Радуйся, Заступнице усердная рода христианского.

Кондак 8

Странно и сумнительно неверующим слышати, како от иконы Твоея токи благодати истекают, воня животная благоухает; мы же, верующе слову, реченному Тобой, Владычице, к первонаписанней иконе: «С тобой Моя благодать и сила», уповаем, яко и с сею иконою благодать Твоя выну; темже благоговейно предстояще лобызаем ю, поклоняемся ей, яко Тебе Самей сущей, честь бо иконы на первообразное восходит, и Твоя благодать сею иконою знамения и чудеса содевает всем с верою притекающим к Тебе и вопиющим Богу: Аллилуиа.

Икос 8

Вся бывши горе, к Небесным взята, и земных не оставляеши, Богомати, священным Твоим предстательством: имаши бо Матернее дерзновение ко Христу Богу нашему. Темже утверди в мире глубоце православных житие и вся полезная всегда даруй рабом Твоим, да величающе воспеваем Ти:

Радуйся, Невместимаго вместилище; радуйся, осененная силою Вышняго.

Радуйся, прозябшая Клас Небесный; радуйся, мир весь душепагубнаго глада избавльшая.

Радуйся, выну ходатайствующая за род наш; радуйся, яко много может молитва Твоя пред Сыном Твоим и Богом.

Радуйся, всех нас при Кресте Сына Твоего усыновившая; радуйся, всегда Матернюю любовь к нам являющая.

Радуйся, Ходатаице вечных благ; радуйся, и во временней жизни полезная нам подающая.

Радуйся, известное прибежище наше во всех скорбных обстояниих; радуйся, несомненное утешение в печалех.

Радуйся, Заступнице усердная рода христианскаго.

Кондак 9

Всякаго естества ангельскаго превышшая явилася еси, Пресвятая Дево: Бога бо зачала еси плотию, Невместимаго всеми вместила еси во утробе Твоей, на руках носила еси Носящаго весь мир дланию; темже, яко Честнейшую Херувим и Славнейшую без сравнения Серафим величающе Тя, вопием о Тебе Богу: Аллилуиа.

Икос 9

Вития многовещанныя, яко рыбы безгласныя, видим о Тебе, Богородице: недоумеет бо всяк язык благохвалити Тя по достоянию, изумевает ум пети Тя, Богородице; обаче Благая сущи, приими и от нас архангельский глас, Тебе вопиющих:

Радуйся, Благодатная; радуйся, яко Господь с Тобою.

Радуйся, Благословенная в женах; радуйся, обретшая благодать у Бога.

Радуйся, родившая Спасителя миру; радуйся, Мати Сына Божия.

Радуйся, Родительнице Вечнаго Царя; радуйся, израстившая нам плод живота.

Радуйся, освященная Духом Святым; радуйся, осененная Силою Всевышняго.

Радуйся, верная Рабо Господня; радуйся, яко Тя блажат вси роди.

Радуйся, Заступнице усердная рода христианскаго.

Кондак 10

Спасти хотящи многия от находящих зол, скорбей и болезней, чудную икону Твою, Богомати, даровала еси, еяже ради слепии прозирают, хромии ходят, разслабленнии возстают, беснующиися исцеляются, земли плодоносие подается, людие от смертоносныя язвы избавляются, грады и домы от огня спасаются; темже прославляюще Бога, дающаго нам таковыя милости, вопием Ему усердно: Аллилуиа.

Икос 10

Стена еси, Богородице, стране Российстей, градом ограждение и слава, православному воинству на враги укрепление. Темже, благодаряще Тя, вопием:

Радуйся, прославляющих Тя прославляющая; радуйся, не чтущих Тя посрамляющая.

Радуйся, врагов устрашение; радуйся, от нашествия иноплеменных избавление.

Радуйся, воинов крепосте; радуйся, в дни брани забрало и ограждение.

Радуйся, в дни мира живоносный саде, увеселяющий сердца верных; радуйся, оружие, егоже трепещут демони.

Радуйся, спасительный елей, умащающий греховныя раны кающихся; радуйся, теплое наше упование.

Радуйся, несумненная наша Надеждо; радуйся, тихое и доброе пристанище.

Радуйся, Заступнице усердная рода христианскаго.

Кондак 11

Пение хвалебное и благодарственное приносят Тебе, Владычице, припадающе ко иконе Твоей и любезно лобызающе ю, дев лицы, под державным покровом Твоим тихое и мирное иноческое житие провождающии, и, возложивше на Тя все упование, радостно вопиют Богу: Аллилуиа.

Икос 11

Яко светоприемную свещу, зрим Твою честную икону, Пресвятая Владычице: та бо невещественный огнь благодати Твоея восприимши, и в подобиих ея новы возжигает светильники, причастны тояжде силы благодатныя, и озаряет чудесы, наставляющи на путь спасения всех вопиющих Ти сице:

Радуйся, Невесто Неневестная; радуйся, Богоизбранная Отроковице, Мати Дево.

Радуйся, добрая Наставнице непорочнаго девства; радуйся, Хранительнице ревнующих о чистоте.

Радуйся, жен похвало; радуйся, дев величание.

Радуйся, вдов заступление; радуйся, сирот призрение.

Радуйся, нищих Питательнице; радуйся, нагих одеяние.

Радуйся, печальных утешение; радуйся, скорбящих веселие.

Радуйся, Заступнице усердная рода христианскаго.

Кондак 12

Благодать дати восхотевши почитающим Тя с любовию, Богородительнице, присущую Ти силу благодатную оставила еси во святых Твоих иконах, ибо Божественная благодать, тем иконам спребывающи, знамения и чудеса выну содевает и душевных и телесных недуг исцеление всем, с верою приходящим, подает Твоими Богоматерними непрестанными к Богу молитвами о вопиющих Ему: Аллилуиа.

Икос 12

Поюще Твоя чудеса, бывшая в древняя и настоящая времена, хвалим Тя, яко Живоносный Источник благодати, яко неистощимую реку чудес, яко бездну милости и щедрот, и все упование по Бозе возлагающе на Тя и в сей и в будущей жизни, прославляюще Тя, вопием:

Радуйся, христиан непостыдное упование; радуйся, верных спасительное прибежище.

Радуйся, ненадежных надеяние; радуйся, отчаянных спасение.

Радуйся, бане, омывающая совесть; радуйся, росо, оживляющая души.

Радуйся, болезней врачевство скорое и безмездное; радуйся, от всех бед быстрое избавление.

Радуйся, Утешительнице во всякой скорби; радуйся, из глубины погибели спасающая.

Радуйся, отрадо в день смерти; радуйся, единая Надеждо и по смерти.

Радуйся, Заступнице усердная рода христианскаго.

Кондак 13

О Всепетая Мати, рождшая всех святых Святейшее Слово, приими ныне малое сие моление и, величия ради благости Твоея и бездны щедрот Твоих, не помяни множества грехов наших, но исполни во благих прошения наша, подавающи телу здравие, души спасение, избавляющи от всякия нужды и печали и Царствия Небеснаго наследники сотворяющи всех верно вопиющих Богу: Аллилуиа.

Этот кондак читается трижды, затем 1-й икос «Ангел предстатель…» и 1-й кондак «Избранней от всех родов…».

О Пресвятая Госпоже Владычице Богородице! Со страхом, верою и любовию припадающе пред честною иконою Твоею, молим Тя: не отврати лица Твоего от прибегающих к Тебе, умоли, милосердая Мати, Сына Твоего и Бога нашего, Господа Иисуса Христа, да сохранит мирну страну нашу, да утвердит державу Российскую во благочестии, Церковь Свою Святую да незыблему соблюдет от неверия, ересей и раскола. Не имамы бо иныя помощи, не имамы иныя надежды, разве Тебе, Пречистая Дево: Ты еси Всесильная христиан Помощница и Заступница. Избави всех, с верою Тебе молящихся, от падений греховных, от навета злых человек, от всяких искушений, скорбей, бед и от напрасныя смерти; даруй нам дух сокрушения, смирение сердца, чистоту помышлений, исправление греховныя жизни и оставление прегрешений, да вси, благодарне воспевающе величия Твоя, сподобимся Небеснаго Царствия и тамо со всеми святыми прославим пречестное и великолепое имя Отца и Сына и Святаго Духа. Аминь.

Заступнице усердная, Мати Господа Вышняго, за всех молиши Сына Твоего Христа Бога нашего и всем твориши спастися, в державный Твой Покров прибегающим. Всех нас заступи, о Госпоже, Царице и Владычице, иже в напастех, и скорбех, и в болезнех, обремененных грехи многими, предстоящих и молящихся Тебе умиленною душею и сокрушенным сердцем пред пречистым Твоим образом со слезами и невозвратно надежду имущих на Тя, избавления всех зол, всем полезная даруй и вся спаси, Богородице Дево, Ты бо еси Божественный Покров рабом Твоим.

Кондак, глас 8

Притецем, людие, к тихому сему и доброму пристанищу, скорой Помощнице, готовому и теплому спасению, Покрову Девы, ускорим на молитву и потщимся на покаяние: источает бо нам неоскудныя милости Пречистая Богородица, предваряет на помощь и избавляет от всех бед и зол благонравныя и богобоящияся рабы Своя.

Комментарии 2

Акафист святителю Герману, архиепископу Казанскому и Свияжскому чудотворцу

Кондак 1.

Избранный святителю, теплый о нас к Богу молитвенниче, угодниче Христов, преподобне отче Германе, яко имеяй дерзновение ко Господу, от всяких нас бед твоим предстательством избавляй, да зовем ти:

Радуйся, святителю Германе, великий чудотворче.

Икос 1.

Ангелом уподобляя непорочным житием святыя твоя Господи, отверзи ми ум и язык, восхвалити богоугодную жизнь, и преподобныя деяния святителя Твоего Германа, да зовем ему, вземшему от юности благий ярем Твой на рамо свое:

Радуйся, благочестиваго корене благочестивая отрасле.

Радуйся, от чрева матерня избранный служити в преподобии и правде.

Радуйся, от отрочестких лет кротким и благим нравом себе украсивый.

Радуйся, от младаго возраста в посте и молитве паче возраста преуспевый.

Радуйся, с учением книжным паче страху Божию себе обучавый.

Радуйся, в юных летех крепким подвижником воздержания себе явивый.

Радуйся, манием Божественным издалеча к великому твоему избранию ведомый.

Радуйся, тем же вседельным манием, исперва яко зеница ока блюдомый.

Радуйся, святителю Германе, великий чудотворче.

Кондак 2.

Видя тщету мирскаго жития, и многомятежность человеческих попечений, блаженне, жизнь твою исперва посвятил еси Богу, во еже непрестанно, и усты и сердцем, воспевати Ему: Аллилуиа.

Икос 2.

Разумом просвещаемый свыше, и желанием влекомый к горней жизни, ты вкупе с богомудрым родителем твоим, паче всего тщася о угождении Богу, отвергий красная мира, тесный иноческий путь избрал еси. Восхваляюще твое благое изволение, взываем тебе:

Радуйся, вне мирскаго мятежа, от младости работати Богу предложивый.

Радуйся, юность твою, яко жертву непорочну, отвержением от мира Богу принесый.

Радуйся, в жизни по Бозе под духовным игуменством будущаго святителя Гуриа преспевавый.

Радуйся, емуже вкупе в великом пастырстем служении в споспешника и преемника благодатию уготовлявыйся.

Радуйся, в тойжде (Волоколамской обители) и сам в меру духовнаго вожденачальства достигнувый.

Радуйся, первым тщавыйся быти в послушании, аще и последним во иноцех себе именовавый.

Радуйся, яко елико смирял еси себе, толико паче благодатию к возвышению был еси уготовляемь.

Радуйся, и смиренным возвращением от начальства на прежнее послушание, новыя духовныя силы для последующаго служения твоего стяжавый.

Радуйся, святителю Германе, великий чудотворче.

Кондак 3.

Силою Вышняго, уготовлявшею тя во спасение твое и многих, ты, избранниче Божий, ведомь был еси от силы в силу богоугодной жизни и дел. Темже и воззван был еси благодатию на служение Церкве, в новопросвещеннем царстве Казанстем, во еже научити и неведущих Спасителя мира, звати Ему: Аллилуиа.

Икос 3.

Имея благое помышление царь, новоприобретенное силою крестною царство Казанское, паче всего устроити во единстве благочестия, да единым духом веры приобщится оно к велицей державе царства Российскаго, аки часть к своему телеси, при первосвятителе Гурии избра тя Собором Церкве в сослужебника ему, о сем ублажающе тя, присноблаженне, глаголем:

Радуйся, соборным гласом на дело апостольское достойно избранный.

Радуйся, усердный делателю Христов в новопросвещенней стране магометанскаго заблуждения.

Радуйся, яко благоплодный сад, святую обитель во граде Свияжсте насадивый.

Радуйся, храм во славу Успения Богоматере, аки неувядаемый трудов твоих памятник в ней соорудивый.

Радуйся, тую первее присноцветущею лепотою подвигов твоих украсивый.

Радуйся, в богоспасаемом братстве новонасаажденныя обители твоея, паче всего плоды послушания и страха Божия возрастивый.

Радуйся, собирая словесных овец в словесный двор, всех и ради спасительнаго жительства, и ради наставления приходивших к тебе, любезно приимавый.

Радуйся, славою добродетелей твоих, многих из мрака магометанскаго нечестия во свет истиннаго благочестия обращавый.

Радуйся, святителю Германе, великий чудотворче.

Кондак 4

Бурю мирскаго жития, многообразными превратностьми злоключений выну воздвизаемую, благоотишно, яко мудрый кормчий, прешед святитель Гурий, в пристанище безмолвнаго покоя достиже; на поприщи бо новопросвещенныя паствы, среде непрерывных трудов подвизася, первосвятитель Казанский успе мирным сном безсмертия, ты же, блаженне, яко первый сослужитель и ревностный преемник ему, да на престоле святителства пастыреначалственне вещаеши Богу: Аллилуиа

Икос 4.

Слышав богоправимый собор великия Российския Церкве, о блаженней кончине перваго святителя великия паствы Казанския, единогласно суди, яко токмо ты избранный Божий достоин возсести на седалищи блаженнаго Гуриа, темже воззванный в царствующий град, аще и отрицался еси по обычному тебе смирению от сана святителскаго, обаче повинуяся соборному определению, восприял еси святителский жезл паствы казанския, темже и мы в веселии приветствуем тя:

Радуйся, благий рабе Господа, верностию в меншем соделавыйся достойным большаго служения.

Радуйся, светильниче, на свешнице во спасение многим поставленный.

Радуйся, наставниче, и словом, а паче примером жизни твоея наставлявый верных и неверных на путь Христов.

Радуйся, пастырю добрый, неусыпным попечением полагавый душу твою о спасении душ пасомых.

Радуйся, мудрый приставниче дома Господня всем, по коегождо потребе нужная устроявый.

Радуйся, верный раздаятелю благо Господа твоего, помощь бедствующым, утешение скорбящым, неоскудно подававый.

Радуйся, в благоговейнем служении твоем, и сердце и преподобныя руце твоя о пастве ко Господу воздевавый.

Радуйся, благоприятными молитвами твоими мир, милость и благодать Божию на новопросвещенныя люди низводивый.

Радуйся, святителю Германе, великий чудотворче.

Кондак 5.

Боготечней звезде уподобился еси, всехвальне святителю; восходя бо благодатию Божиею от силы в силу, по священным степенем иерархии, воззван был еси от паствы казанския на высоту престола митрополии московския, да со всею Церковию воспеваеши Богу: Аллилуиа.

Икос 5.

Видев благоверный царь богоугодное твое житие, святителю, соизволи на вышший свешник всеросийския митрополии поставити тя; ты же, блаженне, по смиренномудрию твоему, являя себе недостойна быти таковаго сана, достойнейшаго поставити умолял еси державнаго, обаче повинуяся званию, уготовлялся исполнити волю цареву; но положил еси в сердцы первее изрещи царю слово правды, яже правда аки зло вменися, и запя тя на пути вручаемаго тебе первопрестолия. Сего ради сугубо ублажаем тя:

Радуйся, и на выстоте святителства смиренная о себе мудрствовавый.

Радуйся, на первопрестолии Российския Церкве паче бремя, неже честь себе видевый.

Радуйся, яко во еже большим послужити во спасение, готов был еси и вышшее служение прияти.

Радуйся, прежде восшествия на высоту престола, во смирении слово царю провещавый.

Радуйся, правды ради гонение и изгнание от предлежащия чести приявый.

Радуйся, слово право пред царем, паче приятия временныя славы предсудивый.

Радуйся, верою и правдою служити благу церкви и царства, необиновенно на первосвятителском престоле помышлявый.

Радуйся, изгнанием правды ради, баженство небесное себе уготовивый.

Радуйся, святителю Германе, великий чудотворче.

Кондак 6.

Проповедник истины был еси, святителю Германе; егда злобнии опричницы восташа на святителя Филиппа, ты един на суде неправеднем глаголал еси пред царем о неправде, возводимой на мужа неповиннаго, вещая в непоколебимей правде Богу: Аллилуиа.

Икос 6.

Возсия, святителю, в новом свете правота духа твоего, егда неповинный святитель Филипп неправедно был судимь и осужден, ты един из святителей воздвигл еси глас в защиту страдальца, благодерзновенно вещая пред царем: яко блаженный он от юности не суда ложна, ни лицеприятия не веде. Ублажающе праволюбие твое вещаем тебе:

Радуйся, при ангельской кротости твоея, крепкий ревнителю благочестия, егда зрел тое небрегомым от нечестия.

Радуйся, поборниче угнетаемой правоты.

Радуйся, безтрепетный защитниче неповинности.

Радуйся, ревностию твоею по истине, древним святым ревнителем уподобивыйся.

Радуйся, благодерзновением Грознаго удививый, но смиренномудрием того на кротость пременивый.

Радуйся, пример любве к правоте и последующым родом оставивый.

Радуйся, при западе жизни твоея, пламенныя лучи светлаго духа твоего в споборении истине показавый.

Радуйся, праволюбивым защищением правоты, течение праведной жизни твоея увенчавый.

Радуйся, святителю Германе, великий чудотворче.

Кондак 7.

Хотя непорочную жизнь твою, яко добрый подвиг скончати, потщался еси и царю в смиренномудрии слово благо рещи и пред царем в защиту мужа праведнаго правое слово провещати, темже совершив течение твое, яко ревнитель благочестия и поборник истины, стяжал еси дерзновение во исходе твоем взывати Богу: Аллилуиа.

Икос 7.

Новаго тя ревнителя по благочестии, и поборника позна Грозный царь и весь совет его, егда вещал еси царю в пастырстей кротости словеса правоты и страха Божия, и на суде святителя, глаголал еси пред царем во огржадение неповиннаго, темже вне паствы твоея, в царствующем граде пребывая в терпении, тамо и блаженную жизнь твою, от посещения Божия града, смертоностным посещением скончал еси. Ублажая смиренное в дусе, но высокое в делех течение жизни твоея и смиренную кончину твою таковая тебе приносим:

Радуйся, ревнителю смиренномудрия от юности путь смирения избравый.

Радуйся, и на священныя степени звание и избрание с смиренным уклонением приимавый.

Радуйся, жизнь твою при боговодимом шествии, якоже в смирении совершавый, такоже в смирении и скончавый.

Радуйся, при кончине твоей очистительною жертвою прегрешений от посещения Божия умерших бывый.

Радуйся, якоже не искавый славы человеческия в жизни, тако смиренное погребение восприявый и в смерти.

Радуйся, яко воистинну странник, выну искавый небеснаго града, в царствующем граде из дольней к горней жизни прешедый.

Радуйся, яко идеже во смирении сном смертным еси опочил, таможде Господь преславно тя чудодействем явил.

Радуйся, святителю Германе, великий чудотворче.

Кондак 8.

Странное и преславное сотвори о тебе, преподобне, прославляяй преподобныя своя Господь. Слышавше бо присная твоя чада, новосажденной тобою обители иноцы, и благочестивии богоспасаемыя паствы твоея людие, града Свияжска жителие, от святых мощей твоих в царствующем граде Москве изливающыяся исцеления, потщашася возвратити тя во град свой, в место первых подвигов твоих на поприщи просвещения верою новоприобретенныя страны, во еже благоприятнее при нетленных мощех твоих пети Богу: Аллилуиа.

Икос 8.

Вседушно, от всея любве, и всенародно, всякаго чина и звания, монаси и мирстии, града Свияжска жителие вожделеша имети мощи твоя, святителю, в созданней тобою обители, в месте славы благодати, действовавшия тобою в духовном созидании иночества, и назидании всех приходящих к тебе ради душевныя пользы. Темже испросивше соизволение благочестивейшаго царя, с неизглаголанною радостию пренесоша святыя мощи твоя, в созданную тобою обитель, и мы в радости их, весело приветствуем тя:

Радуйся, яко по смиренней кончине прославленным тобою Господом прославлен еси.

Радуйся, яко для приятия святых мощей твоих, в благоговейно сретавший тя град сподвигся и сам архипастырь, святитель Ермоген.

Радуйся, яко тойже великий святитель, со всем освященным собором, подобающее твоей святыни надгробное пение соверши.

Радуйся, яко, при внесении мощей твоих в созданный тобою храм Богородицы, дивное благоухание преисполни храм и обитель.

Радуйся, яко к общей благоговейней радости, святыя мощи товя целы и нетленны обретошася.

Радуйся, яко многоразличными исцелении знаменовася слава святых мощей твоих.

Радуйся, яко теми же чудодействии засвидетелствовася, яко обрел еси благодать у Господа.

Радуйся, яко и симбирстии граждане вожделеша имети часть мощей твоих, во освящение и благодатную помощь.

Радуйся, святителю Германе, великий чудотворче.

Кондак 9.

Всякия болезни, живущею в тебе благодатию Святаго Духа, ты святителю врачуеши с верою притекающих к цельбоносным мощем твоим. Сего ради приемлюще тобою благодать исцелений, благодарне приявшему на себе недуги нашя Спасителю поем: Аллилуиа.

Икос 9.

Ветийство человеческое не может изрещи благодати нетления мощей твоих, ни поведати силы чудодействия оных. Мы же таинство верою приемлюще, благочестно вещаем:

Радуйся, чистотою духа от всякаго брения отрешивыйся.

Радуйся, постом и воздержанием, яко благовонною смирною, тело твое тления непричастно сотворивый.

Радуйся, непрестанною молитвою, яко небесным светолитием, тоежде благодатныя силы исполнивый.

Радуйся, всельшимся в тя Животворящим Духом по смерти чудодействуя.

Радуйся, сиявшим в тебе светом Христовым, телесныя и душевныя очи просвещаяй.

Радуйся, богодарованною тебе силою, нечистыя духи от одержимых ими отгоняяй.

Радуйся, в прибегающих к тебе страсти душевныя и телесныя врачуяй.

Радуйся, яко бодренно соделовавый спасение твое, и всех усердно притекающих к тебе спасению споспешествуяй.

Радуйся, святителю Германе, великий чудотворче.

Кондак 10.

Спасти хотя душу твою, отнележе начал еси работати Господеви, всякия скорби, лишения и уничижения добльственно терпя, по блаженней кончине твоея, соделался еси прибежище всем скорбьми житейскими обуреваемым, во еже со всеми взывати благодарно Избавителю всех: Аллилуиа.

Икос 10.

Стена и ограждение нам святыя мощи твоя, присноблаженне; прибегая бо с верою под цельбоносную сень оных, никтоже молитвами твоими, из храма твоего без благодатнаго утешения отходит. В немже бо сам искушен был еси, в сем и искушаемым испрашиваеши помощи. Предстояще убо с любовию живоприемному гробу твоему, взываем:

Радуйся, присный о нас к Богу ходатаю.

Радуйся, бедствующих предстателю.

Радуйся, печальных утешителю.

Радуйся, нуждающихся помощниче.

Радуйся, гонимых прибежище.

Радуйся, обуреваемых злоключении тихое пристанище.

Радуйся, во мраце недоумения сущих богосветлое вразумление.

Радуйся, обидимых заступниче.

Радуйся, изнемогающих духом богомудрое подкрепление.

Радуйся, святителю Германе, великий чудотворче.

Кондак 11.

Пение похвальное приносяще тебе святителю, вемы, яко ни святаго жития твоего, ни преподобных деяний, ни чудес, благодатию Божиею от мощей твоих обильно нам подаваемых, по достоянию не токмо восхвалити, но ниже, якоже подобает, известити возмогохом. Обаче ведуще тя превыше всех похвал суща, во светлостех святых, веселящеся простираем молебный глас о тебе, прославляющему святыя своя: Аллилуиа.

Икос 11.

Светозарный светильник имуще святыя мощи твоя, путь правый нам освещающий, и греховный мрак разгоняющий, блажим тя во обителех горних веселящася, и от неистощимаго источника благодати Божия, благая и полезная по коегождо потребе нам испрашивающа:

Радуйся, за земныя подвиги твоя пренебесными благами от Подвигоположника обдарованный.

Радуйся, за нищету духовную Царство Небесное восприемый.

Радуйся, за воздыхания и слезы непреходящим веселием утешаяйся.

Радуйся, за кротость твою землю вечнаго обладания наследивый.

Радуйся, за алчбу и жажду от неистощимаго потока сладости насыщаяйся.

Радуйся, за милосердие твое, милость от Бога получивый.

Радуйся, за чистоту твою лицезрением Божиим наслаждаяйся.

Радуйся, за гонение правды ради, на месте злачне примирнаго покоя вселяйся.

Радуйся, святителю Германе, великий чудотворче.

Кондак 12.

Благодать, всельшуюся в тя Святаго Духа, явив в жизни, в смерти и по смерти твоея, святителю, облагодати нашу мысль; недоумеем бо, како совершим скудную песнь нашу в похвалу тебе, разве запечатлеем тую совокуплением во едино, яко разделенных лучей, воспетых нами доблестей твоих, да хваляще тя выну усты и сердцем поем Богу: Аллилуиа.

Икос 12.

Поюще твое христоподражателное житие, богомудрая деяния, блаженную кончину, преславная по кончине чудодейсвтия, и явленнейшыя доблести твоя, яко светлыя лучи соединяюще вкупе, от собственных твоих доброт, приносим тебе хваление таковое:

Радуйся, от юности твоея крепким постником и неослабным подвижником себе явивый.

Радуйся, по священным степенем возводимый благодатию, паче восхождением в сердцы по внутренней святости смиренномудренно возвышавыйся.

Радуйся, добльственный блаженнаго Гуриа в духовном созидании паствы казанския сотрудниче.

Радуйся, тогожде достойный в пастыренчальстве преемниче.

Радуйся, имевый звание светити и на высоте Всероссийския митрополии.

Радуйся, исповедниче истины пред царем, и защитниче страдальческия правоты святителя.

Радуйся, на месте смиреннаго покоища чудодейственною благодатию проявленный.

Радуйся, преславно из царствующего града нетленными мощами твоими во обитель твою пренесенный.

Радуйся, основанныя тобою обители священно ограждение и украшение.

Радуйся, яко в скорбех утешение, в болезнех исцеление, мощи твоя нам даровашася.

Радуйся, благоприятный о нас дольних и перстных, вкупе смиренных и грешных, в горних к Богу предстателю, и немолчный молитвенниче.

Радуйся, святителю Германе, великий чудотворче.

Кондак 13.

О великий угодниче Божий, святителю Германе, приими сие усердное к тебе моление наше, и благоприятным твоим пред престолом Святыя Троицы предстательством, моли о нас недостойных рабех твоих, еже избавитися нам от належащих бед, внезапныя смерти и вечнаго осуждения, да сподобимся вкупе с тобою, в лице святых, выну Единому в Троице Богу, Спасителю нашему, воспевати: Аллилуиа.

(Кондак сей глаголи трижды)

Икос 1.

Ангелом уподобляя непорочным житием святыя твоя Господи, отверзи ми ум и язык, восхвалити богоугодную жизнь, и преподобныя деяния святителя Твоего Германа, да зовем ему, вземшему от юности благий ярем Твой на рамо свое:

Радуйся, благочестиваго корене благочестивая отрасле.

Радуйся, от чрева матерня избранный служити в преподобии и правде.

Радуйся, от отрочестких лет кротким и благим нравом себе украсивый.

Радуйся, от младаго возраста в посте и молитве паче возраста преуспевый.

Радуйся, с учением книжным паче страху Божию себе обучавый.

Радуйся, в юных летех крепким подвижником воздержания себе явивый.

Радуйся, манием Божественным издалеча к великому твоему избранию ведомый.

Радуйся, тем же вседельным манием, исперва яко зеница ока блюдомый.

Радуйся, святителю Германе, великий чудотворче.

Кондак 1.

Избранный святителю, теплый о нас к Богу молитвенниче, угодниче Христов, преподобне отче Германе, яко имеяй дерзновение ко Господу, от всяких нас бед твоим предстательством избавляй, да зовем ти:

Радуйся, святителю Германе, великий чудотворче.

Молитва 1.

О святителю Христов Германе, богомудрый обители сея основателю, духовный иночествующих вождю, примером христоподражательной жизни твоея наставляяй! К тебе прибегаем и тебе усердно молим: соделай святыми твоими молитвами, да и мы благодатию Божиею созиждемся во обитель Духа Святаго, последованием жизни твоея воображаемся во образ Христов, во образ преподобия и правды и осеняемии силою богоприятных молитв твоих, приносим плоды благих дел; благоугождающе Господу, да тщимся ходити во свете лица Его, паче всего любити Его, служити во благо ближних наших; и всемерно соделовати спасение свое, на пути многопременчивыя жизни, терпением всякия тесноты, скорбей, лишений. А дабы возмощи нам понести благое иго Христово, моли, святче Божий, о укреплении немощи нашея помощию свыше, да избавит нас Господь от враг видимых и невидимых, от огненнаго и воднаго потребления, от неблагорастворения воздуха и тлетворных ветр, а паче от душепагубнаго пламени, потопления и обуревания страстей наших, да под кровом благости и милосердия Божия, тихое и безмолвное житие поживем, ждуще блаженнаго явления Господа и Спаса нашего Иисуса Христа; Емуже со Отцем и Святым Духом честь и слава, во веки веков. Аминь.

Молитва 2

О святителю Германе, великий угодниче Христов, обители сея богомудрый основателю, монашествующих наставниче, и града сего недремлемый блюстителю, святою душею твоею на небеси престолу Святыя Троицы предстояй, нетленным же телом зде во обители твоей почиваяй, и многоразличная чудеса молитвами твоими совершаяй! Призри на ны и на вся люди, к цельбоносному твоему гробу притекающыя, и твоего ко Господу ходатайства во обдержащих нуждах просящыя. Понеже мы, по множеству грехов наших, не точию недостойни принести со дерзновением молебный глас, но ниже возвести очес наших на небо; ты же яко стяжавый дерзновение, принеси за всех к честней раце твоей приходящих теплыя молитвы ко Господу, страждущую страну нашу Российскую от лютых безбожник и власти их да свободит, и да возставит престол православных царей, верных рабов Его, в скорби и печали день и нощь вопиющих к Нему, многоболезный вопль да услышит и да изведет от погибели живот наш, и да избавит нас от глада, потопа, труса, огня, меча, брани от людей и диавола бывающыя, и от всякия душевныя и телесныя болезни; да избавльшеся сих, и работающе Господу, Емуже предстоиши, внидем в нескончаемый покой, и вкупе с тобою прославим всех благих подателя Бога, всегда, ныне и присно, и во веки веков. Аминь.

Молитва 3.

О великий угодниче Христов, Германе, теплый о нас ко Господу молитвенниче, всем притекающим к тебе в скорбех предстателю, испроси нам помощь в немощех, утешение в скорбех, здравие в недузех душевных и телесных; умоли Господа даровати нам оставление во всех, елика согрешихом от юности нашея в житии сем, делом, словом, помышлением, и всеми нашими чувствы; и при кончине нашея испроси нам время покаяния, да предваривше искренним исповеданием грехов и очищением совести душ наших, безбедно прейдем воздушная мытарства, и избавимся осуждения и муки, милостию безначальнаго Отца, благодатию собезначальнаго Сына, и освящением присносущнаго Духа. Аминь.

Святитель Гурий, в миру звавшийся Григорий Руготин, первый архиепископ Казанский, является образцом милосердия и примером для подражания для многих православных верующих. Молитва Гурию Казанскому мученику, вознесенная ему в час недуга и духовных печалей, помогает христианам укрепиться в вере и найти свой истинный путь в жизни земной.

Житие святого

Дни памяти:

  • 15 июля (переходящая) — Собор Тверских святых
  • 3 июля — Перенесение мощей
  • 17 октября — Обре́тение мощей. Собор Казанских святых
  • 18 декабря

Рожденный в небогатой дворянской семье, юноша был набожен с юных лет. Поэтому, оклеветанный недругами в преступлении, которого не совершал, и заключенный в яму, будущий святитель смирился со своей участью, благодаря Бога за каждый прожитый день. Мало того, Гурий Казанский начал писать азбуки и передавал их нищим.

Через два года с иконой Богоматери святой выбрался из ямы и отправился в обитель, чтобы служить Господу, став монахом. Позже глубоко верующий в силу Господа Гурий становится игуменом монастыря, творя молитвы и восхищая окружающих любовью, терпением и усердием. Под его мудрым руководством на Руси появились десятки церквей и четыре монастыря, где и после смерти архиескопа возносились благодарственные молитвы святителю Гурию Казанскому, славя его мудрость и святость.

В чем помогает молитва Гурию Казанскому?

В дни памяти все православные вспоминают человека, сумевшего прославлять христианскую веру на новых землях. Многие верующие толпами отправляются в Казанский Благовещенский Собор в Казани, где находятся мощи святителя Гурия, чтобы попросить у него помощи в укреплении веры в Господа.

Помогают молитвы святому мученику и в тот час, когда семье вашей требуется помощь, когда нет в ней лада и гармонии. Муж и жена, стоящие на грани развода, тоже могут обратиться к Гурию Казанскому, чтобы он примирил их.

Исцеляют слова молитвы Гурию Казанскому и от болезней, в частности, при сильнейших головных болях и болезней глаз.

Молитвы святителю Гурию, архиепископу Казанскому

Тропарь, глас 4

Пра́вило ве́ры и о́браз целому́дрия,/ учи́теля до́брых дел/ и наста́вника спасе́ния, даде́ тя Госпо́дь/ новопросвеще́нному гра́ду Каза́ни,/ в не́мже приобре́л еси́ но́выя от язы́к лю́ди,/ и приве́л еси́ я Христо́ви./ Сего́ ра́ди в па́мять твою́ ра́достно соше́дшеся,/ че́стне пра́зднуем свято́е твое́ успе́ние,/ ты же, о́тче наш, святи́телю Христо́в Гу́рие,// моли́ Христа́ Бо́га/ спасти́ся душа́м на́шим.

Перевод:

Правило веры и образ целомудрия, учителя добрых дел и наставника спасения, даровал тебя Господь новопросвещенному городу Казани, в нем же обрел ты новых людей из язычников и привел их ко Христу. Потому в день памяти твоей радостно собравшись, с почтением празднуем святое твое успение, ты же, отче наш, святитель Христов Гурий, моли Христа Бога о спасении наших душ.

Ин тропарь, глас 3

Доброде́тельного и благоро́днаго ра́ди твоего́ жития́,/ изве́л тя есть Преще́дрый Бог/ на первопресто́льство богоспаса́емаго ца́рства Каза́ни/ и просвети́л есть уче́нием твои́м бесерме́ньстии язы́цы./ И мно́гия, святи́телю Гу́рие, во избра́нное Христо́во ста́до приве́л еси́,/ и нищелю́бием богоуго́дно пожи́л еси́,/ и по преставле́нии твое́м мно́го лет сокрове́нное твое́ те́ло/ от недр земны́х на удивле́ние яви́ся,/ и благоуха́ннаго ми́ра гроб напо́лнися приходя́щим с ве́рою,/ взима́ющим ми́ро от ра́ки честны́х моще́й твои́х,/ всем источа́еши исцеле́ния,/ святи́телю Христо́в Гу́рие,/ моли́ Христа́ Бо́га// спасти́ся душа́м на́шим.

Перевод:

Ради твоего добродетельного и благородного жития, возвел тебя Прещедрый Бог на престол Богоспасаемого царства Казани и просветил учением твоим татарский народ. И многих, святитель Гурий, ты привел в избранное стадо Христово, и Богоугодно жил, оказывая помощь нищим, и по преставлении твоем сокрытое на много лет тело твое из недр земли удивительно явилось, и гроб наполнился благоухающим миром для всех, приходящих с верой и получающих миро из раки с почитаемыми мощами твоими, для всех ты источаешь исцеления, святитель Христов Гурий, моли Христа Бога о спасении наших душ.

Тропарь святителям Гуpию и Ваpсонофию, Казанским чудотворцам, глас 3

Пе́pвии учи́телие пpе́жде те́мному,/ ны́не же све́тлому и новопpосвеще́нному гpа́ду Каза́ни,/ пе́pвии возсвети́телие пути́ спаси́тельнаго,/ и́стиннии хpани́телие апо́стольских пpеда́ний,/ столпи́ непоколеби́мии, благоче́стия учи́телие/ и Пpавосла́вия наста́вницы, Гу́pие и Ваpсоно́фие,/ Влады́ку все́х моли́те// миp вселе́нней даpова́ти и душа́м на́шим ве́лию ми́лость.

Перевод:

Первые учителя прежде темного, сейчас же светлого и новопросвещенного города Казани, первые возвестители спасительного пути, истинные хранители апостольских преданий, непоколебимые столпы, учителя благочестия и наставники Православия, Гурий и Варсонофий, молите Владыку всех даровать вселенной мир и душам нашим великую милость.

Ин тропарь на пересение мощей, глас 4

Я́ко крин благово́нный,/ мироточи́выя твоя́ мо́щи/ от вертогра́да Це́ркве Спа́совы/ в вертогра́д Це́ркве Богоро́дичны че́стне принесо́шася,/ святи́телю Гу́рие,/ я́ко же бо дар че́стен,/ тя дарова́в Христо́с Пречи́стей Ма́тери Свое́й,/ и испо́лнися храм Ея́ святы́й благоуха́ния твоего́,/ и возра́довася архиере́йский престо́л,/ прие́мый тя, первоседа́теля своего́./ Возвесели́ся же собо́р ве́рных со святи́телем и священнонача́льники/ о пресла́вном цельбоно́сных твои́х моще́й пренесе́нии,/ е́же мы ра́достно пра́зднующе, мо́лим тя, уго́дниче Бо́жий:/ моли́ Христа́ Бо́га// пода́ти душа́м на́шим мир и ве́лию ми́лость.

Перевод:

Как благоухающая лилия, мироточивые твои мощи из сада Церкви Спасителя в сад Церкви Богородицы с почитанием перенесены, святитель Гурий, ибо, как драгоценный дар, тебя даровал Христос Пречистой Матери Своей и наполнился храм Ее святой благоуханием твоим, и возрадовался архиерейский престол, принимающий тебя, старейшину своего. Восторжествовало и собрание верующих со святителем и священноначальниками о преславном перенесении подающих исцеления мощей твоих, которое мы с радостью празднуя, молим тебя, угодник Божий: «Моли Христа Бога подать душам нашим мир и великую милость».

Ин тропарь, глас 4

От мла́дости удаля́яся земна́го мудрова́ния/ и после́довав ско́рбным путе́м Законоположи́телю своему́ Христу́ Бо́гу,/ те́мже и Он тя воздарова́ на земли́ нетле́нием,/ на Небесе́х же со угоди́вшими Ему́ архиере́и ликовству́еши,/ Гу́рие святи́телю,/ моли́ Христа́ Бо́га/ пода́ти оте́честву на́шему на враги́ побе́ду,/ и мир ми́рови,// и душа́м на́шим ве́лию ми́лость.

Перевод:

С молодости удаляясь от земного мудрования ты последовал скорбным путем вслед Законоположителю своему Христу Богу, потому Он даровал тебе нетление на земле, а на Небесах ты радуешься вместе с угодившими Ему архиереями, Гурий святитель, моли Христа Бога подать Отечеству нашему победу над врагом, мир всему миру и душам нашим великую милость.

Кондак, глас 4

Чу́вственныя стра́сти победи́в, чистото́ю, я́ко со́лнце, возсия́л еси́,/ чи́сто житие́ до конца́ сохрани́в,/ и от неве́рия в ве́ру мно́гих ко Христу́ приве́л еси́;/ того́ ра́ди от Бо́га нетле́нием почте́н, чудесы́ твои́ми вся удиви́л еси́./ Мо́лим у́бо тя, святи́телю Гу́рие,/ моли́твами твои́ми от бед изба́ви нас, да зове́м ти:/ ра́дуйся, о́тче преди́вный,// гра́ду Каза́ни похвала́ и утвержде́ние.

Перевод:

Чувственные страсти победив, чистотой, как солнце, воссиял ты, чистое житие до конца сохранив, от неверия к вере во Христа многих привел ты, потому от Бога был почтен нетлением и чудесами твоими всех удивил. Молим же тебя, святитель Гурий, молитвами твоими от бед избавь нас, да взываем к тебе: «Радуйся, отче удивительный, города Казани честь и сила».

Ин кондак, глас 6

И́стине основа́ние и ве́ры утвержде́ние/ и в поуче́ниих преизя́щнаго све́мы тя благоче́стию споспе́шника,/ апо́столом сопресто́льника, страстоте́рпцем соприча́стника,/ по́стником купноревни́теля, похваля́ем тя, Гу́рие святи́телю,// и ве́лия таи́нника Бо́жия благода́ти.

Перевод:

Истины основание и веры утверждение, и в поучениях превосходного знаем тебя, помощника благочестия, разделяющего престол с Апостолами, причастного стратотерпцам, постников соревнователя, прославляем тебя, святитель Гурий, великого хранителя тайн Божией благодати.

Молитва

Святи́телю о́тче Гу́рие, предстоя́ свяще́нной ра́ке многоцеле́бных моще́й твои́х, мо́лим тя усе́рдно бы́ти всегда́ и везде́ на́шим хода́таем, засту́пником и покрови́телем. Исхода́тайствуй па́стве твое́й мир, тишину́, благоде́нствие, здра́вие и спасе́ние. Бу́ди постоя́нным на́шим засту́пником от всех враго́в, ви́димых и неви́димых: покрыва́й нас от нахожде́ния всех бед, напа́стей и скорбей, па́че же от искуше́ний врага́ те́мнаго. Предстоя́щим же зде и моля́щимся испроси́ у Го́спода Бо́га вся, я́же ко спасе́нию своему́ они́ про́сят у Него́ в свои́х ну́ждах и ско́рбях, да все мы с тобо́ю прославля́ем всесвято́е и́мя Отца́ и Сы́на и Свята́го Ду́ха, ны́не и при́сно, и во ве́ки веко́в. Ами́нь.

Добавить комментарий

Ваш e-mail не будет опубликован. Обязательные поля помечены *